أفضل 10 طرق لجذب الأطفال لحضور مدارس الأحد

أفضل 10 طرق لجذب الأطفال لحضور مدارس الأحد

ناس كتير بتفكر إن لازم يكون عندنا شاشات كبيرة وألعاب ضخمة وحركة مستمرة عشان الأطفال يهتموا بالدروس، لكن الحقيقة الأطفال بيتفاعلوا أكتر مع الأساليب البسيطة. والأجمل إن في طرق كتير مش بتحتاج ميزانية كبيرة ولكنها هتخلي مدارس الأحد مميزة، ممتعة، ومؤثرة أكتر ليهم وليك!

أساسيات لإنجاح مدارس الأحد:

1. استقبل كل طفل بحفاوة: قابل كل طفل عند الباب باسمه، سلم عليه أو احضنه لو مناسب، واسأله إذا كان مستعد يدخل الفصل، ولو لقيته لسه مش مستعد اديله لحظة يرتب نفسه قبل ما يدخل. الطريقة دي بتخلي الأطفال يحسوا بأهميتهم وبتساعدهم يركزوا أكتر.
2. خلي فيه اتفاق بينك وبين الأطفال: اتكلم مع الأطفال عن إزاي نحترم بعض وشاركهم في وضع القواعد اللي هيحترموها جوه الفصل.
3. حضّر الدرس كويس: التحضير الجيد هيخليك أقل توتر وأكثر تركيزًا مع الأطفال. كمان الأطفال بيحسوا باهتمامك وده بيشجعهم يسمعوا أكتر.
4. التشجيع بدل العقاب: بدل ما تركز على السلوك السلبي للطفل، شجعه على التصرفات الإيجابية. لو حصل تصرف خاطئ، استخدم التعاطف بدل التوبيخ. مثلًا، لو الأطفال مش قادرين يحافظوا على الهدوء، قولهم: "أنا عارف صعب نقعد هادئين في كل الوقت، بس لما بنحافظ على هدوئنا، بنقدر نسمع بعض أحسن"
5. حافظ على روتين واضح: خلي مدارس الأحد دايمًا بنفس الترتيب، حتى لو كل جزء ممكن يتغير. سواء في تفاصيله أو مدته. الأطفال بيحبوا الروتين لأنه بيخليهم يحسوا بالأمان والاستقرار.
6. استخدم صوت هادي: الأطفال بيتأثروا بالطاقة اللي حواليهم، لو الخادم هادي، الأطفال هيتعلموا الهدوء تلقائيًا. وطبعًا جو الفصل الهادي بيخلي الأطفال يفهموا أحسن ويتفاعلوا بشكل إيجابي.
7. خلي الأطفال يشاركوا: يعني مثلًا ممكن تختار كل أسبوع طفل يكون المساعد ليك، يوزع ورق، يمسك السبورة، أو يساعد في الأنشطة. وممكن تتم عملية اختيار الطفل المساعد باستخدم أعواد خافض اللسان الخشبية الصغيرة الملونة وعليها أسماء الأطفال وبكدة يتم الاختيار بشكل عشوائي.
8. اهتم بالوقت بين الأنشطة: بدل ما يكون فيه لحظات فراغ بين النشاط والتاني، جهّز أنشطة قصيرة تملأ الوقت ده، زي أنك: 
o تسأل الأطفال عن حاجة حبوها في الأسبوع اللي فات.
o تطلب منهم يقولوا آية حفظوها قبل كده.
o تخلى كل طفل يحكي موقف حس فيه بوجود ربنا في حياته، أو فرق معاه خلال الأسبوع اللي فات.
9. خلّي الأطفال يسألوا ويستكشفوا: الأطفال بيحبوا يطرحوا أسئلة، شجعهم على إنهم يسألوا بحرية عن الإيمان والكتاب المقدس وافتح لهم باب التفكير والتأمل.
10. خد أفكار الأطفال بجدية: الأطفال عندهم طريقه تفكير صافية، وأفكارهم ممكن تكون مصدر إلهام للكبار كمان، علشان كدة لازم نسمع لهم كويس. الرب يسوع نفسه قال: "دعوا الأولاد يأتون إليَّ"، وده معناه إن الأطفال عندهم مكانة عظيمة في الإيمان.