فرصة الله صالح وحكيم

فرصة الله صالح وحكيم

📖الشاهد: "لأَنَّ الرَّبَّ صَالِحٌ، إِلَى الأَبَدِ رَحْمَتُهُ، وَإِلَى دَوْرٍ فَدَوْرٍ أَمَانَتُهُ." (مز 100: 5).

🎯الهدف: إن الطفل يفهم إن الله صالح ورحيم وان الله بيكون معاه، وبيعمل حاجة حلوة من كل اللي بيحصل، لأنه طيب وحكيم.

💡الشرح: 
في أوقات كتير بتحصل حاجات بتزعلنا أو توجعنا.. لكن علينا نعرف كويس أن الله لما بيسمح بوجود ألم في حياتنا، بيدينا معاه الاحتمال. 
ساعتها ممكن نسأل: ليه يا رب؟
بس لازم نفهم حاجة مهمة جدًا:
أن أفكار الله غير محدودة، يعني اللي ظاهر قدامي في الوقت ده من ألم وتعب كثير وأمور صعبة، الله بيحوّلها لأمور صالحة أتعلم منها في حياتي. 
الله حكيم وبيعرف بيعمل إيه، حتى لو إحنا مش فاهمين دلوقتي. هو شايف كل شئ بيحصل في حياتي وله قصد منه ومش بيسيب الأحداث للصدفة. 

⚠️ خد بالك من:
مهم جدًا تستخدم أمثلة واضحة للي ممكن يمر بيها الطفل، علشان يقدر يفهم اللي أنت عاوز تقوله.
يعني لما تشرح، قول له:
• ممكن يكون في مشكلة بين بابا وماما.
• أو المدرس بيزعق لك كتير.
• أو زعلان من صاحبك.
• أو نفسك يبقى عندك أصحاب أكتر.
• أو تعبان من مرض.
لكن كمان خليك حريص إنك ما توعدش الطفل إن المشكلة هتتحل دايمًا.
قول له: أيوه ممكن الظروف ما تتغيرش، بس الله بيستخدمها علشان يعلّمنا حاجة أو يشكل فينا.

🎭 وسيلة الإيضاح:
نجيب ليمونة، ونقول:
• مين يقدر ياكل الليمونة دي كده؟  ..............................(أكيد الأولاد هتقول طعمها صعب!)
• نقول: مع إنها طعمها لاذع ومش حلو، بس ممكن نعمل منها عصير ليمون جميل جدًا! بس لازم علشان تعمل كده نجيب سكينة ونقسمها. (نقطعها قدامهم) 
• وكمان محتاجة تتعصر جامد في الكوباية دي (نعصرها في كوباية).
• وكمان لازم نحطلها سكر ونقلب (نضيف مياه وسكر ونقلب).
نعلق ونقول:
• بصوا قد إيه الليمونة اتعصرت واتقطعت واتضغطت… بس في الآخر طلعت عصير ليمون طعمه حلو جدًا.
أحنا زي كده بالضبط، يعني حتى لو سمح الله إننا نمر بحاجات مش سهلة، هو بيطلع منها حاجة حلوة لينا، علشان هو حكيم وبيحبنا جدًا.
بس إحنا نفضل معاه، ما نبعدش عنه، وهو عمره ما هيسيبنا.

🎶الترانيم المقترحة:
ا. ربي حلو. 
٢. الرب معايا أنا مش قلقان. 
٣. لما قلبي يبقى ملكك.
٤. اللي يشوف جمالك ويدوق حلاوة صفاتك.