5 نصايح لو عاوز تعلم الأطفال صح في مدارس الأحد
مدارس الأحد مش بس دروس، دي فرصة لبناء جيل جديد يعرف ربنا بجد. بالصلاة، التفاعل، الأسئلة، التطبيق، والواجبات، نقدر نعلم الأطفال بطريقة مؤثرة وممتعة.
شارك:
5 نصايح لو عاوز تعلم الأطفال صح في مدارس الأحد
لو انت خادم في مدارس الأحد، يبقى عندك دور مهم جدًا في خدمة الأطفال، ولازم تعرف إن ده مش هيجي من غير صلاة وجهد عشان تطور طريقتك وتساعد الأطفال يفهموا ويستوعبوا الصح. أنت عندك وقت محدود عشان تؤثر على الجيل الجديد، وعايز كل لحظة تكون ليها قيمة. في حاجات لازم تأخد بالك منها عشان دروسك تبقى فعّالة والأطفال يستفيدوا.
مدارس الأحد محتاجة خمس حاجات أساسية عشان تكون ناجحة وتقدر بيهم تستغل كل دقيقة:
الصلاة، التفاعل مع الكتاب المقدس، تشجيع الأطفال على طرح الأسئلة، طريقة للرد وتطبيق الدرس، والواجبات المنزلية البسيطة.1. إزاي نصلي صح في مدارس الأحد؟
الصلاة من أهم الحاجات اللي لازم تشتغل عليها مع الأطفال. لو أنت خادم، خليك قدوة ليهم في الصلاة. خليهم يشوفوك وأنت بتصلي، علشان يعرفوا ازاي يصلوا صح. خلي وقت الصلاة اختيارى، بس خليهم يشاركوا في الصلاة معاك لما يكونوا جاهزين. أكيد هتشوف الفرق لما يشوفوك وأنت بتشجعهم على الصلاة معاك. وكمان مهم إنك تعلمهم إن الرد على صلاتهم مش دايمًا هيكون "نعم". ممكن يكون "لا" أو "استنى". وفي وقت ما شجعهم على الصلاة بصوت عالي، خليك دايمًا معاهم لو كانوا مترددين، وكل ما يتعودوا أكتر، هتلاقيهم هما كمان بيطلبوا الصلاة بصوت عالي.
2. إزاي ندرّس الكتاب المقدس بشكل عملي؟
الأطفال بيحبوا الحاجات العملية اللي يشوفوها ويمارسوها. فخليهم يسمعوا ويتفاعلوا مع الكتاب المقدس. زيّ لما تقولهم قصة من الكتاب المقدس، بعدها تخليهم يرسموها، علشان يقدروا يفهموا أكتر ويستوعبوا الدرس، ولو سنهم يسمح أنهم يقرواها معاك من الكتاب المقدس يبقى حلو جدًا، لأن ده بيخلي المعلومة تتخزن في ذهنهم بشكل أفضل.
لو عندك نشاطات زي التلوين، خليهم يلونوا مشاهد من القصة. ممكن كمان تديهم ألعاب زي الكلمات المتقاطعة أو حاجات بسيطة ترفيهية، علشان يجمعوا أكتر بين اللعب والفهم. دي طريقة حلوة إنهم يركزوا في الدرس.
3. إزاي نطرح أسئلة تشجع الأطفال على التفكير؟
أسئلة زي: "إيه اللي حصل في القصة؟" أو "ليه عملوا كده؟" هتخلي الأطفال يفكروا أكتر في الدرس. مش لازم تسكت بعد ما تسألهم، حاول تشجعهم على التفكير أكتر. لما تسأل أسئلة زي دي، هتفتح لهم فرصة إنهم يكتشفوا أكتر عن الكتاب المقدس بطرق تناسبهم وتناسب سنهم. كمان ممكن تعلمهم ازاي يطرحوا الأسئلة بنفسهم، وده هيخليهم يتفاعلوا أكتر مع الكتاب.
4. إزاي نساعد الأطفال يستجيبوا للدروس؟
في آخر الدرس، خليهم يجاوبوا أو يصلوابالحاجة اللي حاسين إنهم فهموها ولمستهم. زيّ ما تقول "يا رب، ساعدني أكون زي نوح وأطيعك"، أو خليهم يرسموا حاجة عن الموضوع ده. مهم إنهم يشعروا بالاستجابة الفعّالة للدرس، مش بس يسمعوا. خليهم يتفاعلوا مع الدرس ويتعلموا من خلاله. ده هيساعدهم على فهم الدرس أكتر، ويخليهم يعيشوا الكلام اللي انت بتقوله.
5. إزاي ممكن تديهم واجبات منزلية؟
ما تخليش الدرس يقف عند الحصة بس. خلي عندهم واجب زي حفظ آية، أو مواظبة صلاة أو خدمة يقدموها للأهل أو المجتمع. تقدر تتابع معهم لو حبيت من خلال رسائل الواتس آب. خليك متواصل معاهم حتى وهم في البيت.
كمان ممكن تبني علاقة قوية مع أولياء الأمور، وتخليهم يشجعوا أولادهم على الحفظ علشان يخلوا أطفالهم مستمرين في التفكير في الكتاب المقدس طول الأسبوع.
في النهاية، لازم نكون دايمًا فاكرين إن عملنا في مدارس الأحد ليه تأثير كبير في حياة الأطفال. خليهم يطلعوا فاهمين ويحبوا كلام الله، ويكون سايب أثر في حياتهم.